LI STOKHOLMÊ MANÎFESTASYON

KURDÊN SWÊDÊ LI DIJÎ REJIMA SADDAM Û ÊRIŞKARIYA DEWLETA TIRK DENGÊ XWE BILIND KIRIN
23.02.2003

Komkar-Swêd
Kurdên Swêd roja 22ê sibatê li dijî Saddam, û dijî êrişkariya dewleta tirk ser Kurdistan başûr mîtîngeke mezin pêkanîn. Mîtînga ku ji alî Komîteya Hevkarîya Hêzên Sîyasî yên Kurd û Kurdistanî, Platforma Kurdên Ewrûpayê, Înîsyatîfa Kurdên Swêdê, Federasyona Komeleyên Kurdistanê li Swêdê, Yekîtîya Jinên Kurdistanê, Yekîtîya Ciwanên Kurdistanê hatibû organîzekirin, mesaja xwe gihand raya gişrtî. Mîtînga kurdan di medya swêdî da wek xebereke rojê cî girt.
.Ji hezarûpêncsed kesî zêdetir mêr, jin, zarok, genc li meydana nav bajajarê Stokholm civîyan, û bi yek dengî bang kirin:

-Bila rejima Saddam nemîne!
-Rê nedin ordiya tirk ku Kurdistana başûr dagire!
-Bila careke din îxanet li kurdan neyê kirin
-Bijî Kurdistan! Bijî Iraqeke federal!

Manîfestasyona kurdan li dijî diktatoriya Sadam û dewleta tirk ya ku haziriya dagirkirina Kurdistana Başûr dike bi serfirazî derbasbû. Kurd li Sergelstorgê meydana mezin ya nav bajarê Stokholmê kombûn bi alayên Kurdistanê û plakat û bi sloganên jorîn xwepêşandaneke xurt nîşandan.Gelek ji besdarên mîtîngê resmên qetlîama Helepçê dabûn dest xwe û nîsanî xelkê didan. Di vê kombûnê de wezîrê mafên mirovî û hevkariyê yê Kurdistanê Şefîq Qezaz jî amade bû û bi ingilizî axavtinek pêşkêş kir. Nûnerên partiyên siyasî yên swêdî jî axivîn. Thomas Hammarberg (ji Navenda Palme), Ulla Hoffman (cîgira seroka Partiya Çep), Conny Fredriksson (Partiya Sosyaldemokrat) Jan Bjorklund (Partiya Gel) Gustav Frodlin (Partiya Keskan), Cleas Malmberg (Hunermend) axifîn û piştgirîya xwe ji gelê kurd re dîyarkirin. Herçend li ser operasyoneke Amêrîkayê raya teva ne yek bû jî, lê li ser mafên gelê kurd, parastina Kurdistana Başûr û Iraqeke Federativ û demokratîk helwesta hemû van partiyan mişterek bû. Herweha hemû axifevanan bi tundî êrişkariya dewleta tirk mehkûm kirin.

Conny Fredriksson bal kişand ser ihtimala xiyaneteke Amêrîkayê û got:
- Kurdistana Iraqê bi rêvebirîya xwe bûye nimûneyeke pêşketî ya demokrasiyê. Wê xiyaneteke pir mezin be eger Amêrîka rê bide ordiya Tirk ku biçin û bikevin Kurdistana Iraqê, işxal bikin.

Li ser navê Komîta Hevkarî ya hêzên siyasî yên Kurd û Kurdistanî M. Sedîq Îmam, û serokê Federasyona Komelên Kurdistanê Keya Îzol jî axivîn. Hunermend Şivan Perwer bi sirûd û stranan civîn geştir û xurtir kir. Bi vî awayî kurdên Swêdê û dostên gelê kurd careke din dengê xwe ji bo piştgiriya gelê kurd bilind kirin.