Ji rayagiştî re

“Pêşangeha pirtûkên kurdî ya duwemîn” ku ji aliyê Yekitiya Komelên Kurdistanê KOMKARê ve di navbera rojên 28-30 gulanê de li bajarê Kolnê pêk hat, kete ber êrişa apociyan.

Li ciyê pêşangehê, digel nivîskar û rewşenbîran, gelek zarok û kesên bi temen mezin jî hebûn. Di vê êrişê de xwedîyê Nasnamê nivîskar Şukrî Gulmuş hat birîndarkirin.

Armanca êrişkaran ew bû ku, bi darê zorê pêşangehê ji hev belav bikin; tirsê berdin ser derdorên welatparêz, niviskar, weşanxane û xwendevanên kurd yên ku hewl didin ziman û çanda kurdî û hemû hêjahiyên neteweyî li ser piyan ragirin û bidin jiyandin.

Êrişeke weha qilêr ji kê re xizmet dike, gelekî aşkere û diyar e. Em, di pişt perdê de dewleta tirk û dardestikên wê dibînin; ew dewleta ku hebûna gelê kurd înkar dike, zimanê kurdî qedexe dike û gelê kurd ji hemû mafên netewî û demokratik bêpar dihêle!

Wek tê zanîn, sala par, dema KOMKARê ji bo vekirina “Pêşangeha pirtûkên kurdî ya yekemîn” haziriya xwe dikir, dewleta tirk xwestibû rê li ber bigre. Bona vê hemû îmkanên xwe yên dîplomatîk ceribandibû, lê bi serneketibû. Mixabin îsal hevkarên xwe yên apocî xistin dewrê ji bo ku pêşangehê belav bikin. Êrişkar ji aliyê rewşenbîrên welatparêz û parêzgerên KOMKARê ji ciyê pêşangehê hatin dûrxistin.

Em, wek weşanxane, rêxistinên demokratîk-sîvîl û kesên ku îmza wan li jêrê ye, êrişa ser pêşangeha pirtûkên kurdî û beşdarên wê, bi tundî rûreş dikin. Em careke dî bangî wan kesan dikin ku hîna jî bin navê kurdîtiyê êrişî hêjayiyên gelê kurd dikin, ku dev ji van êrişkariyên qilêr berdin.

Weşanên Afiş, Weşanên ROJA  NÛ, Weşanên DENG, Weşanên KOMKAR, Weşanên ÖZGE Weşanên KOMAL, Weşanên FIRAT, Weşanên RİYA AZADİ, Weşanên PELDA, Weşanên EVRA