"Zext li ser dewleta Tirk bikin, da ku operasyona xwe rawestîne!"

20 dezgehên demokratîk yên Kurdistanî, ku li seranserê Ewrupayê kar û xebatên xwe dimeşînin, nameyeke ji bo Wezîrên Karêderve yên welatên Ewrupî şandin. Di nameyê da ji wezîran daxwaz tê kirin, ku zext li ser hukumeta Tirkiyê bê kirin, da ku operasyona bejayî ya Başûrê Kurdistanê rawestîne.

Name bi vî awayî ye:

„Rêzdar Wezîr,

Êrîşên dewleta Tirk yên leşkerî li Başûrê Kurdistanê her roj zêdetir dibin. Firokeyên leşkerî yên Tirk, bi hênceta hebûna meqerên PKK, her roj gund, çiya û baniyên Kurdistanê bombebaran dikin. Hêzên zemînî (bejayî) jî car caran li herêmê operasyonan pêk tînin.

Bi nêzikbûna biharê va, hukumeta Tirk bi dehhezaran leşker û çek û aletên leşkerî li ser tixûba Kurdistanê bi cîh kir. Her roj behsa operasyona zemînî ya artêşa Tirk li ser Başûrê Kurdistanê tê kirin. Raya giştî di wê baweriyê da ye, ku operasyona zemînî ya bi berfirehî yeqîn wê bê pêkanîn. Tê zanîn, ku berpirsiyarên dewleta Tirk bi plana dagirkirina hin deverên Kurdistana Başûr û pêkanîna “kembera asayîş”ê mijûl in. Komandoyên Tirk, bi agahdarbûna DYA, hefteya borî ketin nav axa Kurdistana Başûr û ev yek dikare wek gava yekemîn ya vê plan û armancê bê bi nav kirin.

Rêzdar Wezîr,

Berpirsiyarên dewleta Tirk, bi taybetî jî yên leşkerî, bi eşkereyî tînin ziman, ku armanca wan ya sereke ruxandina Federasyona Kurdistana Başûr e. Siyaseta Tirk ya ku li ser înkarkirina hebûna Kurd hatiye danîn, Hukumet û Parlamentoya Herêmî ya Kurdistana Başûr wek talûke û xeter dibîne. Hebûna PKK li ser tixûba Tirkiye û İraqê, ji bo wan tenê hêncet e.

Aramî û îstiqrar li Kurdistana Başur cîgir bûye. Operasyona zemînî ya dewleta Tirk, ku  mafên bingehîn yên mirovî, netewî û demokratîk yên Kurdên di nav tixûbên xwe nas nake, ne tenê wê aramî û îstiqrara herêmê ji holê rake, her weha wê pirsgirêkên Rojhilata Navîn girantir bike û bibe sedema tevliheviyekê, ku dewletên heremê jî bike bin tesîra xwe.

Rêzdar Wezîr,

Êrîşên hewayî û operasyona zemînî ya dewleta Tirk derbeke giran li aşitî û aramiya herêmê dixe û wê bibe sedema dijayetî û pevçûnan di navbera gelên Tirk û Kurd da. Ev dijayetî her weha wê tesîra xwe li welatên Ewrupê jî nişan bide, ku herdu gel di van wan welatan jî dijîn û bibe tehdîtek ji bo aşitî û aramiya civakî ya wan welatan.

Rêzdar Wezîr,

Em dezgehên demokratîk yên navên wan li jêr in û li welatên curbecur yên Ewrupayê karên xwe didomînin, ji hukumeta we daxwaz dikin, ku zext li ser hukumeta Tirk bikin, da ku dev ji êrîşên xwe yên hewayî berde, hêzên xwe yên li axa Kurdistana Başûr paşve bikişîne û dev ji  amadekariya xwe ya operasyoneke zemînî ya berfireh berde.

Kerema xwe, bi lez lebat bikin, ji ber ku wê sibê dereng bibe.

Li gel rêz û silavan...

23.02.2008

Yekîtiya Komelên Kurdistan-KOMKAR-Almanya, Civata Kurd li Fulda, Federasyona Kurdî li Swêd, HEVKAR-Hamburg, KOMJIN-Almanya, KOMCIWAN-Almanya, Federasyona Kurd li Avusturya, KOMKAR-Avusturya, KOMKAR-Belçika, KOMKAR-Danimarka, KOMKAR-Hollanda, KOMKAR-Îngiltere, KOMKAR-Swisre, KOMKAR-Swêd, Enstituya Çand û Zmana Kirmanci (Zazaki) IKK-Berlin, Enstituya Kurdi ya Brukselê-Belçîka, Kultur Kreis Kurdistan e.V.-Karlsruhe, Komela Kurdên Sûrî li Avusturya, Komela Xwendekarên Demokrata Kurdistana Îran li Avusturya, Navenda Organizasyon û Civakî ya Kurd-SOZK-Berlin“