Komcivîna KOMKARê ya 21. bi serketî pêk hat
EU-KOMKAR hat damezirandin

Komcivîna Yekitiya Komelên Kurdistan-KOMKARê ya 21. bi seketî pêk hat. Her di vê komcivînê da damezirandina Konfederasyona Komelên Kurdistan li Ewrupa EU-KOMKAR jî hat ilan kirin.

Komcivîna EU-KOMKARê, di bin dirûşma „Dest ji çekan bikşînin!

Divê pirsa Kurd di nav aramî û aşîtiyê da bê gengeşîkirin!“,  di 17-18.10.2009´an da li bajarê Wuppertalê li Elmanyayê civiya. Ji bilî nêzikî 100 nûnerên şaxên KOMKARê yên seranserê Ewrupayê, her weha ji her çar perçeyên Kurdistanê û ji Elmanyayê endam û nûnerên partî, dezgeh, sazî û rêxistinan beşdarî kocivînê bûn û gotarên xwe pêşkêş kirin. Ji welat û Ewrupayê, bi dehan kes, dezgeh, sazî û partî jî bi peyam û birûskên xwe komcivîna EU-KOMKARê pîroz kirin.

Komcivîn, bi axaftina yek ji damezrênerên KOMKARê û endamê kevintirîn Huseyîn Guler despê kir. Pey ra diwan hat hilbijartin û beşdar ji bo rêzgirtina hemû şehîdên Kurdistanê deqîqeyekî bê deng man.

Roja yekemin, nûnerên KOMKAR-Elmanya dûr û dirêj li ser raporên kar û bar û aborî yên birêvebir nîqaş kirin û dîtin, rexne û pêşniyarên xwe pêşkêş kirin. Pey erêkirina raporan û îbra kirina birêvebiriyê, KOMKAR-Elmanya organên xwe yên nû hilbijart.

Piştra, bi beşdarbûna nûnerên komelên derveyî Elmanyayê, gengeşiya li ser destûrnama EU-KOMKAR despê kir. Nûner, dîtin û nêrînên xwe yên li destûrnamê  bi berfirehî anîn zman û biryar hat dayin, ku destûr bi awayê ku hatibû amade kirin bê pejirandin. Lê her weha komîsyonek ji sê kesan pêk hatî hate hilbijartin û nûner desthilat (selahiyet) dan vê komîsyonê, da ku bi awukatek ra bişêwire, destûrnamê têkûztir bike û ger ji aliyê huqûkî hin kêmasî hebin, wan temam bike. Pey qebûlkirina destûrnamê, ji bilî Elmanya, bi beşdarbûna, komelên KOMKARê yên Swêd, Danîmarka, Îngîltere, Fransa, Belçîka, Hollanda, Swîsre, Awusturya, EU-KOMKAR hat damezirandin.

Roja duduyan, mêvan jî beşdarî komcivînê bûn, heqê axaftinê girtin û gotarên xwe pêşkêş kirin.

Di despêkê da, li ser navê Partiya Maf û Azadiyan HAK-PARê Serokê Giştî Bayram Bozyel axifî. Bozyel di axaftina xwe da pesnê kar û xebatên KOMKARê, bi taybetî jî yên pey 12 Îlonê da û ji bo pişgiriya KOMKARê ya bo HAK-PARê spasiyên xwe pêşkêş kir. Bozyel her weha bal kişand pêvajoya heyî ya Tirkiyê û hewldanên dewleta Tirk yên di warê çareseriya pirsa Kurdî. Bozyel gavên dewletê erênî nirxand, lê bal kişand wê yekê, ku ev gav û hewldanên dewletê ji bo çaresriya pirsa Kurd ne bes in û çareserî bi teslîm kirina mafên gelê Kurd yên neteweyî û demokratîk mumkin e. Bayram Bozyel da zanîn, ku divê neyê ji bîr kirin, ku ger hewldan, têkoşîn û berxwedana Kurdan xurtir nebe, dewlet gavên pêştir wê nevêje. Ji ber vê yekê jî divê hêzên Kurd kar û xebatên xwe hîn xurtir bimeşînin.

Serokê HAK-PARê Bayram Bozyel, di dawiya axaftina xwe da ragihand, ku her diçe rê li ber xeta tevgera azadî û aşitîxwaz vedibe û bivê nevê wê ev xet ser bikeve. Bozyel her weha pît kir, ku ew di doz û tekoşîna xwe da bi biryar in û bi hêvî ne.

Piştî axaftina Bayram Bozyel, li ser navê Partiya Çep (die Linke) Birêz Zielezinski gotara xwe pêskêş kir. Zielezinski, spasdariya xwe pêşkêşî KOMKARê kir, damezirandina EU-KOMKARê pîroz kir û weha got: „Em xweşhal in, ku navenda KOMKARê li Wuppertalê ye û KOMKAR komcivîna xwe li Wuppertalê pêk tîne. Em di wê baweriyê da ne, ku divê Kurd li Tirkiyê û li Elmanyayê wek gel bên pejirandin û mafên xwe bi dest bixin.“

Her weha endamê Birêvebiriya Partiya Çep ya bajarê Ludenscheidê, siyasetmedarê Kurd Yasin Kut jî beşdarî komcivînê bû pişgirî da KOMKARê kir.

Li ser navê Partiya Demoktat a Kurdistan-PDK-Iraq Liqa 6 Kak Serhed, li ser navê Hizbî Demokrata Kurdistana Îran Kak Şahsuwar, li ser navê Partiya Azadiya Kurdistan-PAK Kak Bijang, li ser navê PDK-Bakûr-Komîteya Elmanya Kak Hamdullah, Sekreterê Giştî yê Partiya Îslamiya Kurdistan Hîkmet Serbilind, li ser navê KOMJINê Belgin, Endamê Birêvebir yê Mala Êzdiyan li Oldenburg nivîskar û şair Eskerê Boyîk, nivîskar Şukru Gulmuş, endama Partiya Keskan Ciler Firtina û endamê meclîsa şaredariya Bottropê ji Partiya Çep Şahîn Aydin axivîn. Axaftvan, kar û xebatên KOMKARê bilind nirxandin û banga yekîtî û tevxebata hêzên Kurdistanî kirin.

Sekreterê Giştî yê Partiya Sosyalist a Kurdistan-PSK Mesud Tek, Kemal Burkay (Siyasetmedar-Nivîskar), Hemîdê Dewrêş (Sekreterê Partiya Demokrata Peşverû ya Kurd li Suriyê), Bavê Azad (Siyasetmedar), Arîf Sevînç (Gerînendeye Giştî yê Rojnameya Dema Nû-Amed), Ozlem Sara çekîç (Endama Parlamena Danîmarka), Yaşar Kilerci (Serokê Kurt-Kavê), Sînemxan Bedirxan, PSK Komiteya Derveyîwelat, Tevgera Demokratên Şoreşger Komîteya Ewrûpayê, KOMJIN, Desteya Weşana Agirî-Kurdistan, Federasyona Komeleyên Kurdistanê li Swêd-FKKS, Welat Azad (Berpirsiyarê Giştî yê malpera Welatname-Qoser), Dr. Îbrahîmê Mehmûd, Dr. Husên Hebeş, Prof. Dr. Husên Bektaş, Sîdar Bîngol (Serokê KOMKAR-Hollanda), Têmûrê Xelîl (Rojnamevan-Nivîskar), Dilbixwîn Dara (Berpirsiyarê Malpera Avesta), Şefîk Oncu (Nivîskar), Lewend Dilînî (Nivîskar), Redaksiyona Malpera Amîda Kurd, Bayram Ayaz (Siyasetmedar), Xalidê Hekarî (Siyasetmedar), Necatî Tank (Nûnerê Komela Pişgiriya HAK-PARê li Elmanya), Kutbettin Ozer (Siyasetmedar), Dogan Saribaş (Îspanya), Hasan Bildirici, Tahsin Demirsoy jî bi peyamên xwe KOMKARê pîroz kirin û damezirandina EU-KOMKARê wek gaveke giring nirxandin. Peyam ji aliyê dîwanê va hatin xwendin.

Di dawiya komcivînê da organên EU-KOMKARê hatin hilbijartin û biryarên komcivînê hatin pejirandin.

Komcivîn, bi axaftina kedkarê doza Kurd û Kurdistanê, siyatmedar û nivîskar Yilmaz Çamlibel, bi serkeftî bi dawî bû.

------------------

Pêşniyar ji bo Biryarên Komcivîna KOMKAR-EU

Biryara li ser Kurdistana Bakûr û Tirkiyê

Komara Tirkiyê ji avabûna xwe heta nuha hebûna Kurdan înkar kir û siyasetek asîmîlasyon û tunekirinê ajot. Lê gelê Kurd û hêzên wî yên netewî ji bo bi destxistina mafên xwe yên netewî û demokratîk, li hember siyaseta înkar û tunekirinê bê deng neman û xebatek bi piralî ajotin û ev tekoşin îro jî didome.

Di merheleya ku îro em tê da ne, tekoşîna azadiya gelê Kurd, her usa tesîra guhartinên li dinyayê Komara Tirkiyê anî wê rewşê ku êdî nikaribe siyaseta xwe ya kevn bidomîne. Bi taybetî di sala 2009´an da, Serokkomarê Tirkiyê Abdullah Gul, di axaftinên xwe yên li hin cîhan da got; ”Wê tiştên baş bibe” û ” Pirsa Kurd girîngtirîn pirs e li ber Tirkiyê.” Li dû van daxuyaniyan pêvajoyek despê kir. Ev pêvajo ji aliyê hukumeta AKP berê wek ”vebûna Kurd” û paşê wek ”vebûna demokratîk” hat binav kirin. Ev hewldan nîşan dide, ku Komara Tirkiyê êdî nikare siyaseta xwe ya berê bimeşîne.

Li gor me pirsa Kurd, pirseke netewî ye û li ser esasên mafên wekhev, ango bi sîstemek federalî dikare bê çareserkirin. Divê gelê Kurd jî wek hemû gelên dinyayê, mafê xwe hebe ku li ser qedera xwe bi xwe biryarê bide.

Em wek KOMKAR, gotinên Serokkomar û hewildanên hukumetê, îflasa siyaseta resmî ya Dewleta Tirkiyê a 85 salan dinirxînin û vê hewildanê giring dibînin. Ev hewildan dikare ji bo dawiya bikaranîna tund û tûjîyê bibe wesîle, bo çareseriya pirsa Kurd, zemînek azad û demokratîk veke û xizmeta sîstemek azad û demokratîk  bike.

Komcivîna KOMKAR-EU, piştgiriya hemû hewildan û hengavên hukumetê bo çareseriya pirsa Kurd dike. Her usa bo çareseriya pirsa Kurd, piştgiriya daxwaza federaliyê dike û xebatên xwe yên di wî warî da jî didomîne.

Ji bo Kurdistana Başûr û beşên din

Di roja 25.7.2009´an da, gelê me li Kurdistana Başûr bo hilbijartina Serokatiya Heremê û bo nûnerên Parlametoyê hilbijartinek pêkanî. Pêwîst e bê gotin ku beriya hilbijartinê dagirkerên Kurdistanê û dijminên gelê Kurd, bo serneketina hilbijartinê, propagandayek gelek kirêt ajotin. Lê li gel hemû cehdên dijmin, gelê me li Kurdistana Başûr, çi wek lîsteyên cuda, çi jî wek serbixwe, bi hemû deng û rengên xwe ve hilbijartinek demokratîk û serketî pêkanî.

Di vê hilbijartinê da, hilbijêrên Lîsteya Kurdistanî, piraniya dengan girtin. Lîsteya Goran û lîste û partiyên din jî karîbûn nûnerên xwe bişînin Parlamentoyê. Em vê hilbijartina  Kurdistana Başûr, bo bicîhkirina demokrasiyê qonaxek girîng dibînin û ji dil va pişgiriya wê dikin.

Birêz Mesud Barzanî jî bo serokatiya Herema Kurdistana Federal ji nû va hat hilbijartin. Em carek din jî wî pîroz dikin û piştgiriya xwe bo wî nîşan didin.

KOMKAR-EU, ji bo çareseriya pirsa bajêrên Kurd yên wek Kerkuk, Mûsil û bajarokên din ku tevlî herema Kurdistanê bibin, piştgiriya benda 140. ya makzagonê dike.

Li Kurdistana Rojhilat û Kurdistana Rojava, xebata gelê me bo azadiyê dom dike. KOMKAR- EU, piştgirya tekoşîna azadî û wekheviyê li wan beşên Kurdistanê dike. Bi partî û rêxistinên azadixwaz ên wan beşên Kurdistanê ra di nav hevkariyek dostane da dibe.

Biryara li ser Kurdên diyasporayê

Li gor meqamên fermî yên Ewrûpayê, Kurdên ji Suriyê, Îran û Tirkiyê, her çend wek xelkê Tirk, Îranî û Suriyeyî bên hesibandin jî, îro li welatên Ewrûpayê 1,5 mîlyon Kurd dijîn.  Bi taybetî nifşên nû yên ku li Ewrûpayê mezin bûne, bûne beşek ji civata wan welatan.

Wek tê zanîn Kurd, li seranserê Ewrupayê di qada fermî da wek ”gel” nayên qebûl kirin: Ji ber vê yekê jî mafên wek zman, çand, civakî û huqûkî bepar in. Her weha taybetiyek gelê Kurd jî ew e, ku welatê me ji aliyê Tirkiye, Îran û Suriyê va hatiye dagir kirin. Ji ber vê rastiyê jî berpirsiyarî û erkên me zêdetir dibin û erkekî girîng dikeve ser milên rêxistinên me yên demokratîk li diasporayê ku gringîyek taybet bide xebata lobî û peydakirina dostan. KOMKAR-EU, biryar digrê ku li ser pirsgirêkên kulturî, civakî, nasnamê û entegrasyonê, civîn konferans û çalakîyên curbecur pêkbîne.

KOMKAR-EU, ji bo lobiyek xurt û peydakirina piştgiriyek hîn xurtir bo gelê Kurd, biryar digrê ku bi qadro, endam û hogirên ku zimanê biyanî dizanin û ji bo karên lobiyê guncav in, têkiliyên wan bi KOMKARê ra tune bin jî bi wan ra civîn û semînerên taybet pêkbîne û îradeyeke navendî pêk bîne.

Li ser bikaranîna zimanê Kurdî

Gelek girîng e, ku em bi hemû zaravayan zimanê xwe yê zikmakî di hemû qadên jiyanê da bikarbînin. KOMKARê ji roja avabûna xwe heta îro di warê bi karanîna zimanê Kurdî da xebatên gelek hêja kiriye. Ev xebata me îro jî dom dike. Lê gava meriv li rûdan û guhartinên li Tirkiyê dinêre, di vî warî da pêwîstî bi xebatek hîn bi rêk û pêktir û xurttir heye.

KOMKAR-EU, biryar digrê ku di jiyana rojane û di hemû warên jiyanê da bikaranîna zimanê Kurdî bike armanca xwe. Di civîn û çalakiyên xwe da hewl bide, ku zimanê Kurdî bikarbîne. Ji bo kesên Kurdî dizanin, Kurdiya xwe pêşve bibin û ji bo kesên ku Kurdî nizanin di komeleyan da qursên zimanê Kurdî veke. Her usa li ser ziman û edebiyata kurdî da çalakiyên cuda pêkbîne.

Li ser entegrasyon û rewşa jinên Kurd

Sedema hatina piraniya jinên Kurd welatên Ewrupî şer û stembarî ye. Jinên Kurd, li welatên Ewrupî jî bi pirs û pirsgirêkên curbecur rûbirû dibin. Pirsa entegrasyonê û nezanîna zimanên welatên ku lê dijîn, zehmetiyên jinên Kurd zêdetir dike.

KOMKAR-EU biryar digre, ji bo ku jinên Kurd fêrî ziman bibin û beşdarî jiyana civakî û aborî ya li welatên ku lê dijîn bibin û pirsa entegrasyonê bi hêsanî bê çareserkirin, di kar û barên xwe û di qada hukûmet û sazî û dezgehên Ewrupî kar û xebatên hîn aktîvî bimeşîne.