Birêzan,

Ji bo vexwendnama we em pir spas dikin û hêvîdar in hûn di kar û xebatên xwe da her serkeftî bibin.

Wek we jî di vexwendnama xwe da diyar kiriye, reng û dengê qedîm yê Kurdistanê, birayên me yên Êzîdî bi dehan car rastî qetlîman hatine. Lê belê dîroka Kurdistanê jî bi eşkereyî nîşan dide, ku Êzîdî tu car li ber zulmê serî danenîne û bi berxwedana xwe her mane û îro jî li ser piya ne.

Armanc û hedefên dagirkeran û peykên wan yên terorîst, bê guman ji holê rakirina nasnama Êzîdî ya hezar salan e. Lê belê taybetmendiyeke êrîşa têrorîstî ya 14. Tebaxa 2007´an heye û divê neyê ji bîr kirin. Pêvajoya Kerkuk, Maxmûr, Şengal û derdorên Kurdistana Azad ji aliyê raya giştî va eyan e. Kurdistanî, bi giştî ji bo ku Kerkuk û derdorên heremê vegerin li ser Kurdistanê, her dem çalak in. Ev ne tenê daxwazeke sirûştî û dîrokî ye, her weha ji aliyê raya piraniya gelên Iraqê va hatiye pejirandin û di Makzagona Dewleta Iraqê da jî cîh girtiye.

Deshilatdarên dewletên heremê, wek her deskeftiyên Kurdistana Azad, ji van çalakiyên Kurdistaniyan jî aciz in û her dem têkilî pêvajoya Kerkukê dibin. Ji ber ku ew baş dizanin, ku „Kerkuk dilê Kurdistanê ye“ û ger vegere nav tixubên Hukûmeta Herêmî a Kurdistanê, wê deshilatdariya Kurdistana Azad hîn bi hêztir dibe. Ji ber van sedeman dagirker tu car ji êrîşên têrorîstî dest nakşînin û alîkariyê didin hêzên terorîst yên heremê.

Bê guman êrîşa 14. Tebaxa 2007´an jî parçeyeke van lîstikên dagirkeran e. Lê belê divê neyê ji bîr kirin; Êzîdiyatî rengeke bingehîn ya çand û diroka Kurdistanê ye. Çi Êzîdî, çi Musluman, çi Mesîhî û çi Xaçparêz, Kurdistanî li dijî êrîşkariyên bi her rengî wê mil bi mil berxwe bidin û ev êrîşana wê yekîtî û berxwedana Kurdistaniyan bi hêztir û bilindtir bike.

Em êrîşên her cure yên li ser Êzdiyan wek li me hatiye kirin dihesibînin, êrîşa 14. Tebaxê bi tundî careke din şermezar dikin û şehîdan bi giramî bi bîr tînin. Êşa we, êşa me ye.

Şêhîdên Kurdistanê namirin!

Bijî Kurd û Kurdistan!

13.08.2008

Yekîtiya Komelên Kurdistan-KOMKAR