Ji dagirkeriya Kurdistana Başûr ra na!

Dewleta Tirk, bi bombebarana xwe ya li ser gelên sîvîl û pir û çiya û baniyên Kurdistanê têr nebû. Bi hêzên leşkerî yên zemînî dest bi êrîşê kir. Li gor agahdariyan 10 hezar leşkerên Tirk, bi alîkariya tank û helîkopteran tixûba Kurdistana Başûr derbas kirin û ketin nava axa Kurdistana Azad. Dîsa li gor agahdariyan, 4 hezar Kurdistaniyên derdora Amediyê dor li tank û leşkerên Tirk girtine û xwestine ew ji axa Kurdistanê werin derxistin.

Dewleta Tirk, hebûna hêzên PKK li ser tixûbê dike hêncet. Lê pirî caran bi xwe jî înkar nake û bi eşkereyî dide zanîn, ku armanca wê ji holê rakirina Hukumeta Heremî ya Kurdistanê û Kerkûk e. Ew, bi dehan dek û fêlan hewl da, ku pêşî li referandûma statuya Kerkukê bigre. Armanc û hedefa wê ya bingehîn dagirkirina Kerkukê ye, ku vê demê eşkere nake.

Bê guman, bê agahdarkirina DYA, ev êrîş pêk nayê. Ji ber vê yekê jî, em bang li Dewleta Yekgirtî ya Amêrîka û Hêzên Hevpeyman dikin: Kurd li dîroka xwe haydar in û ji bo parastina aramî û aşitiya herêmê berpirsiyariyên xwe tînin cîh. Lê divê DYA û Hêzên Hevpeyman jî berpirsiyariyên we yên dîrokî ji bîr nekin û rê li ber amadekariya dagirkeriyê ya dewleta Tirk bigrin.

Em bang li hukumetên Ewrupî dikin: Tirkiye berendamê Yekîtiya Ewrupayê ye. Zextên li ser hukumeta Tirk zêdetir bikin, da ku dest bi êrîşkariyê berde û bi Kurdan ra rûnê. Banga me li dewleta Tirk e: Pirs ne li derveyî tixûban e. Pirs, pirsa gelekî 20 mîlyonî ye di nav tixûba Komara Tirkiyê. Di pêvajoya îroyîn da pirsgirêk ne bi riya şer, bi riya diyalogê çareser dibin. Werin guh bidin dengê gelê Kurd yê aşitîxwaz, da ku di navbera gelê Kurd û Tirk da birînên kûr yên tu car cebar nabin peyda nebin.

Banga me li hukumet, dezgeh û berpirsiyarên Kurdên Başûr e: Em hesasiyetiyên we fam dikin. Lê dîsa jî li dijî êrîşkariya dewleta Tirk helwestên hin bi hêztir nişan bidin. Ji bîr nekin, ji helwesta Kurdistaniyên derdora Amediyê jî careke din eşkere dibe, ku çi bakûr û çi başûr, çi rojhilat û çi rojava, Kurdistan yek welat e û êşa her Kurdekî bi giştî dilê Kurdan diêşîne.

Em bang li hêzên Kurdistanî yên Bakûrê Kurdistanê dikin: Nakokî û cudatiya xwe deynin aliyekî. Gelê Kurd hewcedarî pêşengiyeke yekgirtî ye. Ji bîr nekin, ku gelê me yê cefakar û wefadar ji bo azadiyê zortirîn bedel da di rûbarê cîhanê da. Divê em li hember vî gelî stûxwar nebin. Li hember zilm û zorê hêzên xwe bikin yek. Bi metodên demokratîk û hevdem derkevin pêşiya gel û di her qada jiyanê da berxwedana xwe geştir bikin.

Banga me Kurdistaniyên li Ewrupê ye: Hêzên xwe bikin yek. Çalaktir bibin. Li ku dibin bila bibin, li hember zilma dewleta Tirk dengê xwe bilind bikin. Gelê me yê Kurdistanê tenê nehêlin. Pişgir û alîkarên Kurdistanê zêdetir bikin. Ji bîr nekin: Wek rêberê nemir

Doktor Abdurrahman Qasimlo goti, „Hezar dost hindik, dijminekî zêde ye!“

23.02.2008

Yekîtiya Komelên Kurdistan-KOMKAR