Kurdên Li Başûrê Almanya Newroz Li Munîhê Pîroz kirin

Bi destpêkirina pîrozkirina cejna berxwedan, têkoşîn û azadîyê Newrozê va, wekî li her cîyê  ku Kurd lê dijîn, Kurdên ku li Başûrê Almanya cîwar in jî roja 15.03.2008 li bajarê Munîhê Newroza vê salê pîroz kirin.

Newroza ku ji alîyê Yekîtîya Komeleyên Kurdistan-KOMKARê va hatibû amedekirin bi coşekî mezin û bi beşdarbûna nêzîkî 1500 kesî bi kêfxweşî hat lidarxistin.

Di şeva Newroza ku gelek mêvanên hêja beşdar bûn û Newroza gelê Kurd pîroz kirin da, gelek mesajên piştgirîyê jî hatibûn şandin. Nivîskar û sîyasetvan Kemal Burkay, Sekreterê Giştî ê Partîya Sosyalîst a Kurdistan-PSK Mesud Tek, endamê Perlementoya Awropa ê Partîya Keskan Cem Ozdemîr, Perlementera Partîya Keskan Renate Ackerman, endamê Meclîsa bajarê Munîhê ê Partîya Çep Orhan Akman, rojnameya Dema Nû û Revaberîya navenda KOMKARê çend kes û dezgehên ku bi mesajên xwe piştgirî dan şevê û Newroza gelê Kurd pîroz kirin bûn.

Perlementerê SPD ê Meclîsa Federal Dr. Alex Berg, Perlementer û Serokê fraksîyona SPD li Bayern Franz Maget, Li ser navê serokê Şaradarîya bajarê Munîhê Christian Ude, Yaşar Fîncan, endama meclîsa şaradarîya Munîhê a ji Partîya Keskan Gulseren Demîrel, endama meclîsa şaradarîya Munîhê a ji Partîya Çep Brigitte Wolf, endamê Partîya Demokrat a Kurdistanê-PDK-Iraq li Başûrê Almanya Şivan Xalo, li ser navê KOMKAR-Munîhê M. A. Dogan, li ser navê KOMCIWANê Rohat D., beşdarî şeva Newrozê bûn û piştgirîya xwe ji bo gelê Kurd pêşkêş kirin û Newroza gelê Kurd pîroz kirin.

Li salona bi navê Mehrzweckhalle, Kurdên li Başûrê Almanya dijîn, ji saet 19:00 heta saet 00:30 bi stran û kilamên hunermendên hêja Şivan Perwer, Nîlufer Akbal, Mikaîl Aslan, Kanî û Koma Muzîkê, koma Dengên Ciwanên Azad û Koma KOMCİWANê a Govendê va carna Helepçe bibîr anîn û carna jî tekoşîna rîya azadîyê. Carna dest di destan da, mil bi mil, dil bi dil govenda azadîya Kurd û Kurdistanê girêdan û di nav kêf û xweşîyê da cejna  Newrozê pîroz kirin.

Di salona ku bi nivîsên wekî Türkische Arme Raus Aus Kurdistan(Leşkerê Tirk Ji Kurdistanê Derkeve), Her Tişk Bo Kurdistanek Azad, Kerkuk Kurdistan e, Newroz Pîroz be hatibû xemilandin da, hunermend Şivan Perwer jî bang li ciwanên Kurd kir, ku hem zimanê xwe fêr bibin, hem jî xwedî li çand û zimanê xwe, sembolên netewa xwe derkevin.

Rojcan Çarîn