Pêşangeha pirtûkên kurdî ya duwemîn bi serfirazî pêkhat

"Pêşangeha pirtûkên kurdî ya duwemîn" ku ji aliyê Yekitiya Komelên Kurdistanê KOMKARê ve hatibû organîzekirin di navbera rojên 28-30 gulanê de li bajarê Kolnê pêk hat.

Roja yekemîn pêşangehê bi xwendina marşa netewî "Ey reqîb" hat vekirin. Piştî axaftina serokê KOMKARê Fettah Tîmar, nivîskarê gelê kurd ê navdar M.E.Bozarslan û rojnamevan Mecîd Şêxo qisekirin. Dûra bernameyeke çandî bi stran û govendên kurdî hat pêşkêşkirin. Roja duwemîn semîner û panêl hatin derbaskirin. Sê helbestvanîn kurd, Mehmet Tanrikulu, Husên Hebeş û Eskerê Boyîk helbestên xwe xwendin. Nivîskarên kurd M.E.Bozarslan, Wezîrê Eşo û Mecîd Şêxo li ser rewşa çapemeniya kurdî jî do heta îro gelek agahdariyên hêja pêşkêşî zanîna guhdaran kirin. Roja dawîn de KOMKARê xelatên weşanxana pêşkêşî wan kir.

Di sê rojên pêşangehê de bi dehan weşanxaneyên kurdan pirtûkên xwe ji bo frotin û nasandinê raxistin ber çavê xwendevan, bi dehan nivîskarên kurd li wir pirtûkên xwe îmze kirin, bi xwendevanan re dan û standin kirin. Bi kurtî ev sê rojên han bûn çalekiyeke çandî ya ku ji dost û dijminên gelê kurd re dida xuya kirin ku zimanê kurdî, çanda kurdî zindî ye, kurd di bin hoyên dijwar de jî bona pêşdabirina ziman û çanda xwe gavên giring davêjin.

Apociyan êriş anîn ser Pêşangeha pirtûkên kurdî

"Pêşangeha pirtûkên kurdî ya duwemîn" di roja yekemîn de (28 gulanê) kete ber êrişa apociyan.

Li ciyê pêşangehê, digel nivîskar û rewşenbîran, gelek zarok û kesên bi temen mezin jî hebûn. Di vê êrişê de xwedîyê Nasnamê nivîskar Şukrî Gulmuş hat birîndarkirin.

Armanca êrişkaran ew bû ku, bi darê zorê pêşangehê ji hev belav bikin; tirsê berdin ser derdorên welatparêz, niviskar, weşanxane û xwendevanên kurd da ku xwe ji xebat û çalakiyên weha dûr bigrin. Daxwaza serleşkeriya tirk e: yên ku hewl didin ziman û çanda kurdî û hemû hêjahiyên neteweyî yên kurdan li ser piyan dihêlin û pêşdadibin gereke bên sekinandin, bên bêdengkirin. Wextê ku bi xwe raste-rast nikarin bikin hevkarên xwe yên apocî diajon pêş, wan li serê kurdan dikin bela..

Wek tê zanîn, sala par, dema KOMKARê ji bo vekirina "Pêşangeha pirtûkên kurdî ya yekemîn" haziriya xwe dikir, dewleta tirk xwestibû rê li ber bigre. Bona vê hemû îmkanên xwe yên dîplomatîk ceribandibû, lê bi serneketibû. Mixabin îsal hevkarên xwe yên apocî xistin dewrê ji bo ku pêşangehê belav bikin. Êrişkar ji aliyê rewşenbîrên welatparêz û parêzgerên KOMKARê ji ciyê pêşangehê hatin dûrxistin.