Li Wuppertalê “4emîn Pêşangeha Pirtûkên Kurdî”

Dema Nû/ Wuppertal

“4emîn Pêşangeha Pirtûkên Kurdî”, ji aliyê Yekîtiya Komeleyên Kurdistanê-KOMKARê ve  li bajarê Wupertalê yê Elmanyayê hat lidarxistin.  Di pêsangehê de gelek pirtûkên Kurdî ku ji aliyê we şanxeneyên Kurdî ve hatine weşandin, hatin raxistin.

4emîn Pêşangeha Pirtûkên Kurdî, di 1ê Sibatê de  li bajarê Wupertalê yê Elmanyayê bi beşdarbûna gelek siyasetmedar, nivîskar, rewşenbîrên Kurd û Alman yên wek Sekreterê Giştî yê Partiya Sosyalîsta Kurdistan-PSKê Mesud Tek, nivîskarên wek Yılmaz Çamlibel, Mehmet Bayrak, E.Cengîz Çamlibel Huseyin Çagrı Tekin, Riza Katurman, Husên Hebeş, Hasan Malla, hunermend Şivan Perwer û Yilmaz Seydo, Nûnerê PDKê Huseyin Akreyî, Nunerê Komeleya Hak-parê Necati Tank, ji daireya biyaniyan ya SDPê Arif İzgi, Berpirsê Pirtûkxaneya Wuppertalê Sehrmann, birêvebirê ARGEyê Meyerratkeen û hwd. û gellek kurdên li derveyê welat hat lidarxistin.

Pêşangeha, bi axaftina endama KOMKARê Seyran Çamlibel hat destpêkirin.  Seyran Çamlibelê di axaftina xwe de destnîşan kir ku dewleta Tirk, hê jî hebûna Gelê Kurd qebul nake û he jî zext û bandora wan ya li ser çand, ziman û hemû nirxên kurdan, dom dike û weha got; “Ji ber sedemên polîtîkya  dewleta Tirk ya li dijî kurdan, çand û zimanê kurdî bi xeteriya wendabunê re rû bi rû maye.”

Çamlibelê, herweha bal kişand li xebatên KOMKARê û weha got; “KOMKAR  ji avabûna xwe û heta niha di nav hewldanê de buye ku xizmeta çand, ziman û nirxên neteweyî yê kurdan bike û bi pêş bixe. Herweha, di vê çarçoveyê de bi sedan pirtûk, kovar û rojname weşandiye û ev xebatên me, hê jî dom dike. Herweha, em dixwazin bi çalakiyên bi vî rengî di navbera pirtûkxane, weşanxane û xwendevanên kurd de pireyek ava bikin.”

Herweha, axaftinek jî ji aliyê Şaredara Wuppertalê Ursala Schmidt ve hat kirin. Ursala Schmidtê di axaftina xwe de destnîşan kir ku ligel hemu hewldanên pêşîlêgirtina “4emîn Pêşangeha Pirtûkên Kurdî” ku ji aliyê konsolosxaneya dewleta tirk ya li Elmanyayê ve hat kirin, ev pêşangeh hat lidarxistin  û weha got;  “Herkes dizane ku Kurd, xelqeke cuda ye. Ya herî rast û xwezayî jî ew e ku ji bo parastin û bipêşxistina ziman û çanda xwe, di nav tekoşînê de be.”

Herweha, heman rojê di çarçoveya “4emîn Pêşangeha Pirtûkên Kurdî” de ji aliyê Dr. İbrahim Mahmood ve, li ser jiyan û hunera sînemayê ya hunermendê navdar Yilmaz Guney semînerek hat lidarxistin. Dr. İbrahim, di axaftina xwe de destnîşan kir ku kurdayetî û zaroktiya Yilmaz Guney, ji bo pêşeroj û hunermendiya wî ya serkeftî buye bingeheke girîng û weha dom kir; “Yilmaz Guney, ligel hunera sînemayê di warê nivîs û edebiyatê de jî gellek berhemdar buye. Guney, ne tenê lîstikvan bû. Ew, herweha senarîst û nivîskar bû jî.  Piraniya mijarên filmên Guney li ser rastiya jiyana civakê hatibû avakirin.”

Dr. İbrahim Mahmood, herweha destnîşankir ku hemu fîlmên Yilmaz Guney, ji çand û jiyana civakî ya Gelê Kurd hatine xwedîkirin û ji ber vê yekê jî, divê fîlmên Guney wek bingeh û destpêka sînemaya Kurdî bên qebulkirin.

Dr. İbrahim diyar kir ku Yilmaz Guney, bi fîlmên xwe yên wek “Rê” û “Kerî” li seranserê dinyayê hat naskirin û bû xwedî çendîn xelatên girîng ku 47 ji van xelatan li Tirkiyeyê û 17 xelat jî yên navneteweyî stendiye.

Hêjayê gotinê ye ku di çarçoveya “4emîn Pêşangeha Pirtûkên Kurdî” di standên pirtûkan de pirtûkên weşanxaneyên Kurdî yên wek KOMKAR, Roja Nû, Riya Azadî, Deng, Veng, Vate, Firat, Oz-Ge, Birnabun, Nasname û Afiş Mediayê hatin raxistin û herweha, ji aliyê KOMJIN, hunermendê navdar Şivan Perwer û IKVê ve satanda berhemên kurdî hat vekirin.

Herweha, pêşangehaka wêneyan ku ji berhemên Girênendeyê Giştî yê Rojnamya Dema Nû û wenesaz Arif Sevînç pêk hatibû, hat lidarxistin.

“4emîn Pêşangeha Pirtûkên Kurdî” wê 3 roj dom bike.