Şandeya KOMKARê Serdana Parlamenterên CDU kir

Şandeyeke Yekîtiya Komelên Kurdistan-KOMKARê di 28ê Gulana 2008´an da bi Parlamentera CDU Sitî Gitta Connemann û Berdevkê Wezîrê Derve, Parlamenter Eckart von Klaeden ra hevdîtinek çê kir. Hevdîtin di avahiya Parlementa Federal ya Elmanyayê da pêk hat. Endamê şandeyê Taner Uçar da zanîn, ku ew dixwazin wek KOMKAR bi hemû partiyên Elman ra hevdîtinan pêk bînin û vê hevdîtinê giring nirxand û spas li parlamenteran kir.

Şande di ziyaretê da bi kurtî KOMKAR da nasîn û her weha li ser pirsên Kurdên Elmanyayê û li ser bûyerên dawîn yên Tirkiyê û Kurdistanê agahdarî da û ji bo çareseriya pirsa Kurd pişgirî ji wan xwest.

Parlamenterên CDU jî gotin, ku KOMKAR û kar û xebatên wê nas dikin û her weha di rojên pêş da wê hewl bidin, ku bi KOMKARê ra kar û xebatên hevbeş bimeşînin.

Endamên CDU bal kişandin hin guhartinên demokratik yên van demên dawiyê li Tirkiyê û gotin, ku ev guhertin ji bo endametiya YE´yê ne bes in. Parlamenter her weha nêrîn û pêşniyarên KOMKARê li ser çareseriya pirsa Kurd realist nirxandin û dan zanîn, ku pişgirî didine wan pêşniyaran. 

Şandeya KOMKARê jî guhartinên li Tirkiyê wek xapînok bi nav kir û eşkere kir, ku di vî warî da gavên berbiçav nayên avêtin. Şande her weha got, ku ger pirsa Kurd çareser nebe, wê aramî û îstîqrar li Tirkiyê bi cîh nabe û wek partiya li ser hukum ji CDU xwest, ku di hevdîtinan da zexta li ser Tirkiyê zortir bikin, da ku ew di warê çareseriya pirsa Kurd da gavan bavêje.

Şandeya KOMKARê û parlamenterên CDU eşkere kirin, ku bi vê hevdîtinê xweşbîn bûn û her weha daxwaza berdewamiya têkiliya herdu aliyan kirin.